將民關參選2019區選，source: 01
近日一單血饅事件，引起唔少關心時事嘅連登仔關注，好多人都喺度鬧葉子祈議員掟饅頭一幕唔知做乜，好柒。雖然柒就真係有啲嘅，但有時前線都係會柒㗎啦，係咪塗鴉串錯字俾大公文匯影低話你唔識字，就同前線義士割席，屌晒老母先？唔係吖嘛。
但有啲人，佢地係偽黃，係利益集團，真係食人血饅頭。為咗俾外區人都可以了解吓被倒人血饅頭嘅將民關點解抵死，我都係寫返篇文俾大家以後講將民關都可以loop一loop，慳返啲口水對付啲打手好過。
首先我地要睇返呢個利益集團係點形成。其實「將軍澳民生關注組」本來係一個泛民嘅地區聯盟，喺2000年由當時嘅四位西貢區泛民嘅居民代表－－范國威（時任唐明苑法團主席）、舒孝傑（時任廣明苑法團主席）、陸平才（富康花園法團主席）、何惠儀（時任尚德邨居民代表）組成。呢舊嘢係當時為咗處理區內不平均沉降問題開始，組成同演變出嚟嘅居民組織，再 further clarify 其實絕對唔係選舉用；當時有共識要俾各屋苑代表輪流揸旗，但後來有人騎劫至今，睇返柯耀林自己話2003年擔任主席至今，相信佢有份騎劫。
呢度先回顧吓柯耀林係乜嘢嚟：當時係廣明苑法團秘書嘅柯耀林喺2003年嘅時候以獨立身份乘反23條風波帶嚟嘅政治效應喺廣明苑當選，之後入咗卿姐檔「前綫」（隨後2008年同民主黨合併）。但之後地區工作乏善可陳，街坊素已積怨，2007年險勝同樣做過法團主席、一樣係泛民嘅舒孝傑連任後，2011年輸俾民建聯嘅莊元苳。當時柯耀林嘅說法係被舒孝傑鎅票，但睇record兩個嘅總和都唔及建制派。點都好，之後柯耀林就好似收咗山一樣。
將民關啲大佬，即係喺2020年3月7日凌晨宣布退出、但最近又疑似「彈入」嘅將民關召集人陳展浚、佢師傅陸平才、黨友謝正楓等，當時仍然係民主黨成員。陳展浚當時死都要參選軍寶，但其實新民主同盟嘅黎銘澤一早落咗區。由於泛民係有協調機制，而喺協調機制之下，陳展浚最終輸俾黎銘澤，無得選；所以佢同師父陸平才以及黨友們合作，退出民主黨，同黎銘澤對撼。有關詳情可以睇返《可憐的陳展浚》一文。
冇錯，佢地喺退黨之前，其實早就已經不受民主黨黨團嘅約束，十分自由自在咁以「將軍澳民生關注組」名義去做地區工作，呢一點亦都可以喺佢地騎劫「將軍澳民生關注組」呢個當時已經餘下空殼嘅衛星組織度睇到：喺未退黨之前，為咗壯大勢力，亦都以資源收攬咗當時打算代表本土派落區嘅前將軍澳本土網絡成員加入將民關，填充同騎劫呢個本來只係居民協作平台嘅組織（因此加入嘅本土派人物已悉數退出）。陳展浚同佢師傅陸平才等等當時退出咗民主黨之後，就淨係落返呢個老字號牌頭，咁街坊只會知道佢地係泛民，2015年嘅時候投泛民嘅咪繼續投將民關囉。
一路發展落去，將民關已經被騎劫成一個小有勢力嘅地區政黨；即使當時只有謝正楓同埋本身已經係區議員嘅陸平才成功當選或者連任，但佢地實際上大展鴻圖嘅決心睇嚟未有改變。此後將民關繼續喺區內周圍插旗，不停挑戰西貢區泛民第一大黨新民主同盟嘅地位（好明顯，票源相近先有得爭㗎嘛），搞到世界大亂。
咁時間去到大約2016年新東補選，大家應該知道當時梁天琦選緊新東啦。當時一班支持本土派，為梁天琦助選嘅義工，因為連續幾晚喺尚德十字路口拉票，所以就叫大家做「尚德手足」。當時嘅葉嘉榮係其中之一，亦都有反映過佢對地區嘅意願。咁對地區有興趣本來唔係問題，就算佢其實都係熱狗嚟都好——所以佢之後嘅立法會選舉就走去幫陳雲。當然，問題亦都唔大嘅，講真佢有權決定幫一個啱心水嘅人嘅。
但之後就問題大啦：佢喺2017年5月，公開宣佈自己加入將民關。一隻熱狗走去加入自稱泛民嘅將民關，你咁樣都得呀？我嗰陣都有諗佢可能係為咗資源嘅啫，但佢而家係召集人喎？仲未計佢以「尚德手足」呢個名做社團註冊，全世界都無人敢食梁天琦嘅人血饅頭，但將民關嘅葉嘉榮食咗。（between，尚德係天琦票倉嚟）
仲有佢唱衰工聯會對手又戇鳩到頭盔都唔戴俾人告誹謗，結果破產冇得選，明明衰戇鳩，但佢最後一刻公開話自己受「政治打壓」「DQ」，要街坊過票俾 so-called Plan B 李嘉睿。屌你，老奉呀？
嚟到2017年尾，廣明苑無啦啦轉管理公司俾新公司置佳，街坊質疑原有法團無啦啦召開得七十零戶出席嘅特別業主大會，用57%票數通過換管理公司嘅決定有問題。當時嘅柯耀林就出山，同將民關帶領廣明苑一批業主，就業主立案法團撤換管理公司一事展開抗議行動，最終成功換法團，柯耀林就係法團主席；管理公司亦都繼續係原稱新昌嘅昇捷。
多咗個地區樁腳，又有「光復法團」嘅光環，將民關繼續大展鴻圖之際，爭凳仔嘅問題永遠都唔會完。最鐘意就係收到風邊度有人諗住落就搵人早少少霸位等人地落唔到嘅將民關今次面對鐘意空降大石砸死蟹嘅民主黨，竟然賤到連隱形建制都收歸旗下：話說由於都善選區呢民主黨搵咗莊榮輝空降落嚟，按協調機制呢民主黨係有優先權；但將民關就同上屆區選喺軍寶嘅情況一樣唔想跟協調機制，聲稱喺 2015 年曾經表示支持民建聯候選人胡綽謙、又同容海恩喺街站派揮春嘅都會駅業委會副主席李栢棠早喺莊榮輝落區之前已經開始代表將民組做緊都善區，所以繼續支持自己友。因為咁，都係將民關嘅柯耀林就出嚟喺民主黨內話反對莊榮輝空降。
雖然民主黨大石砸死蟹空降都係仆街（仲喺沙田整死咗帝怡），但柯耀林始終仍然係民主黨新東黨團嘅人，同時又係將民關人，自己動作多多之餘又唔支持返同黨黨友落區。民主黨中委會喺 2018 年 9 月通過改列將民關為政治團體，即係話所有民主黨員冇得雙牌頭出選，要二擇其一。天下烏鴉一樣黑，拖拉三個月，年尾柯耀林連同另外58名黨員先退出民主黨，話返人轉頭唔尊重協調機制。而呢班人，亦都成為咗後來嘅區政聯盟。
btw，2019年5月先成立嘅區政聯盟，講到明係要選立法會嘅。
之後喺反送中期間，將民關嘅人血饅頭事蹟亦都係有目共睹：首先係自己整個721遊行，行晒自己參選嘅選區然後終點TVB，食血饅食到出晒面，最後葉嘉榮要道歉、仲有謝正楓「一時情急」拆路障出賣義士爭選票；再嚟係區選多區鎅票，搞到真手足何梓聰等人輸俾建制方國珊及其黨羽。如果咁樣都唔係人血饅頭，咁咩嘢先係人血饅頭？差啲唔記得，佢地上屆區議會反送中議案唔投票添～
喺血饅事件之前嘅一日，喺兩位區政聯盟議員出席嘅網台節目上，主持話「反對改名就係共產黨」，鄭仲文竟然微微點頭表示認同。即係原來唔認同你地嘅都係共產黨呀？
將公共設施冠名唔係一件輕易同隨便嘅事：周陳二人其實離開咗我地唔夠一年，我地又未贏，啱唔啱？抗爭未竟先冠名，聞所未聞；鄭仲文仲話228紀念碑，咁人地都係開始轉型正義之後由公民運動推動出嚟啦，同埋都有問受難者家屬㗎。係喎，柯耀林話唔諮詢梓樂彥霖家人係因為唔想打擾佢地，咁而家啲家屬實無受打擾啦下話？
而家拎嚟講唔單止係得個嘈字仲要係唔會對件事有幫助，公園定名final say喺康文署，因為區議會只係諮詢機構。況且改咗個名，係咪周同學陳同學可以昭雪先？係咪有個名就可以真相大白先？得閒搞啲咁嘅飛機嘢不如諗下點樣喺議會追究警暴啦。係呀阿李嘉睿話整咗個公園就可以話係區議會轄下場地popo立入禁止，佢離地離咗去邊呀？嗰度俾你改咗名都係康文署管㗎，同埋popo會因為你呢句而唔入個公園嘅話，你黨友王卓雅就唔會喺你黨友陸平才嘅地頭（aka 富康花園，佢係業主立案法團主席）度俾人拉啦下話？
調景嶺公園所在選區嘅議員葉子祈完全唔知情、一時又話問咗屋企人一時又話未問又話會問又話唔駛，然後拎咗蔡明禧個和議返嚟，咁樣推個議案出嚟成件事根本步驟就錯晒，亦都係製造事端嘅根本原因，將民關本來就責無旁貸。但當其他 so-called 同路人叫佢收回議案，動議人柯耀林同和議人鄭仲文仲上網台節目，認同反對議案嘅人係共產黨，不知錯、不悔改之餘仲走去捉鬼？
至於喺區會大大聲話「個個都係食人血饅頭入嚟」嘅李嘉睿走去學人講執政意志，我想問咁將民關提呢個議案之前係咪唔應該係你覺得鐘意就爆出嚟呀？你咁樣點做執政黨呀？拎個議案要同stakeholder溝通係咪唔識呀？你連嗰個選區嘅區議員都唔問你就走去搞人地選區啲嘢喎，政治倫理上係咪講唔過去呀？特別大家都要諗，葉子祈係維景區議員，個公園喺佢選區，佢都要面對自己啲街坊，你地將民關咁樣擺人上台都得嘅咩？
我唔知柯耀林會唔會真係劍指立法會，但係佢今次放晒啲議員、家屬上枱嘅結果係乜嘢？首先佢可以話自己爭取追究警暴，但實際上一個名根本追究唔到啲乜；其次如果過唔到，佢又可以話其他人都係共產黨，即係佢先係將軍澳唯一民主派，如果佢選立法會，其他黨派啲票唔多唔少會過咗去佢度。咁又算唔算人血饅頭呀？
屍骨未寒尋冤待雪，佢地嘅建議竟然係公園改名，仲要完全不顧家屬感受，一時話問咗一時話未問一時話會問一時話唔駛問；陷害手足以及同路人、無視政治倫理、唔尊重死者家屬，sorry 我真係唔覺得係私怨。如果一次半次都可以私下講算數，但呢班不願溝通，唯我獨尊仲鬧返人共產黨嘅偽黃政棍，我諗真係好難唔公開屌，話佢地食血饅真係不為過。
冇錯，不論往績、定係今次事件，佢地都係食人血饅頭。