（2020年3月7日凌晨，陳展浚退出將軍澳民生關注組。不過，最近陳展浚又以召集人身份代表將軍澳民生關注組就反填海遊行一事發言。有關將軍澳民生關注組之詳情，請見另稿：pici.me/將民關）
唔少街坊可能都聽過陳展浚呢個人名；近幾個月嚟嘅抽水行為，甚至成功爭取阻路避雨亭連座椅等等嘅事蹟，相信都深入民心。不過，大家睇到嘅只係冰山一角，要講佢嘅黑歷史，就要由2012年講起。
「其實我也不想發公開聲明給你的，但你一次又一次地騙我，我真的給了你機會……」（黃之鋒，2012）
2012年，時值反國教運動萌芽之時，當時不過中六嘅陳展浚係學民思潮嘅成員。12年7月，陳展浚懷疑監守自盜，將市民捐俾學民嘅錢落格，結果被勒令退出學民思潮。但被踢出之後嘅佢，竟然冒認學民思潮，向人民力量嘅人索取金錢，話要成立一個新的學生組織，但被拒絕。
期間，佢繼續冒認自己嘅學民成員身份。咁都未算最過份，呃錢不成嘅佢仲開街站冒認學民思潮籌款；被踢爆後，佢又轉投公民黨幫陳家洛助選。學民隨即聯絡各大政黨，叫大家小心提防呢個人；誰不知陳展浚就做咗黃成智嘅受薪選舉助理！陳展浚依舊自稱學民思潮成員，喺網上招募義工搞反洗腦街頭劇，仲同人講黃成智「有大水喉」幫手，亦表示黃成智團隊可以協助佢成立一個新嘅學生組織。
結果？當年學民思潮迫於無奈出聲明，公開質疑陳展浚嘅個人誠信同操守。接下來，黃成智嘅競選經理發表聲明「強烈譴責學民思潮」，要求學民思潮收回聲明；但原來黃成智對聲明不知情，幾小時後聲明又被撤回；黃之鋒亦唯有以千字文另行回應，形容已對陳展浚仁至義盡。
「有人為一己私利，破壞得來不易的協調機制，更企圖以鵲巢鳩佔、玉石俱焚的方法，脅迫新同盟黎銘澤離開軍寶區」（新民主同盟，2015）
當一個人為咗呃錢可以罔顧政治理念，見風駛艃隨處黐嘅時候，可想而之佢人格真係可以無下限。投靠咗民主黨嘅陳展浚之後就去咗將軍澳做地區工作，師從陸平才。佢對議席嘅追求可謂非常極致；為咗呢一席，佢決定死都要參選軍寶。
佢想選一件事，但係泛民係有協調機制呢回事，而陳展浚係軍寶區就有競爭對手——新民主同盟嘅黎銘澤；協調機制之下，陳展浚最終輸俾黎銘澤，無得選。你以為陳展浚就咁就算？當然唔係啦。陳展浚要嘅係議席，所以佢選擇退出民主黨，同黎銘澤對撼。為咗議席，陳展浚同師父陸平才合作，以2015年10月10日為限，話要「一命換一命」，威脅如果黎銘澤唔退選，就會搵人去澳唐區同呂文光界票。
結果？新民主同盟開記者會交代事件，又去廉署報案，事件得以曝光。至於黎銘澤，就繼續順利做到議員，而陳展浚就成為該區最低票嘅落選人。可憐嘅陳展浚，失去民主黨嘅靠山，又失落議席……
「所謂『君子不立危牆之下』，明知條柱彎咗仲企埋去打卡，嗰啲人應該唔係君子啦！」（將軍澳青年力量，2016）
或者大家對佢嘅影相打卡相當有印象，但係佢又點止打卡咁簡單吖？2014年，佢就試過被控刑事毀壞，涉嫌將政敵易拉架揼落垃圾桶，最後獲判無罪。
而2016年6月，佢喺香港網絡大典嘅資料就被修改，陳展浚過往喺學民思潮嘅事就咁樣「被消失」，而且亦淡化咗恐嚇新同盟一事，仲攻擊政敵低票當選。邊個做？你懂的。
（原文刊於本人Facebook專頁，惜被檢舉而移除。對此等無恥之徒，本人深表遺憾。）