坡鐵換CEO的啟示?

坡坡鐵近年壞得好密,比起香港代表龜龜仲要過之而無不及。喺南洋島國人民對龜龜無比嚮往之時,坡坡鐵可能已經激到交通部長許文遠爆咗唔知幾多條血管。

不過每次換CEO,坡豬都會有啲莫名其妙嘅寄望,覺得新嘅救世主可以帶領坡坡鐵走出黑暗。當年郭木財上任嘅時候,大家一樣當佢救世主,點知佢任內就死咗兩個伙記,浸咗條隧道,撞爛兩架車,近半百乘客受傷。今日(4月18日)坡坡就宣佈郭木財失業,嚟緊會由梁建鴻接任 — — 梁建鴻同郭木財都係前三軍總長,鴻哥仔仲係現任國防部常任秘書長(發展),全民皆兵嘅坡豬當然好鐘意佢,對佢嘅期望自然都唔細啦。

不過大家冷靜啲諗,搵軍佬做就得的話,就唔會死咗兩個伙記、浸咗條隧道、撞爛兩架車、近半百乘客受傷咁威武啦。無他嘅,由 North East Line 東北綫 嘅年代開始,坡坡鐵已經被新捷運比下去,所以冇乜耐性嘅坡坡政府,唯有將 Downtown Line 濱海市區綫 都俾埋新捷運。但係坡坡鐵嘅表現依然強差人意,實行三日一小壞,五日一大壞,連環列車故障搞到成條綫癱瘓嘅奇聞就一啲都唔陌生啦,搞到撞死人呀,水浸呀碰碰車呀,呢啲真係好難想像會喺坡坡發生(如果你以為坡坡超越香港blar blar blar的話)。

坡坡鐵亂局都唔係第一日嘅事,事關坡坡鐵本身班友嘅作風仲hea過衝燈都只係鬧兩句就算嘅KCR。人地KCR管理最混亂嘅時期都死過人,不過係近代管理正常返少少,埋尾再整件老田出嚟整頓吓,起碼好頭好尾先。坡坡呢?經驗少,做嘢鳩hea,私有化完喇被政府旗下淡馬錫收購返喇再搵推軍佬ff吓有軍法統治可以紀律嚴明啲喇,結果呢?咪又係咁。所以即使許文遠走去話郭木財要對坡坡鐵企業文化問題負責,但awful day依然會來喔。

裕群站碰碰車事件後,交通部長許文遠 (Khaw Boon Wan) 向傳媒形容當日係「可怕嘅一日 (It’s an awful day)」。梗係啦,上次水浸隧道今次碰碰車,仲唔係你為官生涯入面最可怕嘅一日?

坡坡鐵係一間企業、一間鐵路公司。我唔見得JR東日本要搵自衛隊啲人嚟做顧問喇,日本自衛隊醜聞都唔少,係坡坡軍隊啲醜聞唔會俾你知啫。當年國鐵未民營化之前,大部分員工以前都係日軍嚟,事緣二戰日本戰敗後軍隊被解散,軍人無野做,因而被安排喺國鐵工作;但上野事件同首都圈國電暴動兩壇野,大家都睇到啲人力資源幾「好」啦,啲瘀血要民營化之後先至大刀闊斧斬斷咗。再睇香港,搵紀律部隊做老闆嘅結果都有眼睇,先唔講休班警vs當更警,你望曾偉雄去咗九巴之後就死咗就嚟廿個人,再炒幾條友製造關公災難,就知妄想搵軍佬/紀律部隊去做企管改變企業文化會有啲咩後果。

上年(2017年)十月水浸隧道事故,調查發現維修人員偽造檢查記錄,無check扮check咗,導致未及早發現後備水泵一早就失靈。

雖然凡事無絕對,但係鐵路嘢搵返鐵路人管、企業嘢搵返企管人搞,總好過搵軍、官呢啲人嚟搞。你有冇見過SBS個CEO係軍人?又有冇見過馬時亨份CV寫佢除咗政府之外一啲企管經驗都無?況且,無論郭木財定係梁建鴻,對於企業管治嘅認識幾多?對鐵路或者公共運輸嘅了解又有幾多?我當你係外行人,你有田北辰咁嘅能耐我唔介意,但如果你只係曾偉雄咁嘅料,咁坡坡豬們就自求多福啦~~


後記:雖然各大官媒吹奏緊梁建鴻,但係坡坡都有正常人類,知道吓吓搵軍佬做CEO係唔正路之舉,仲走去改Wikipedia,話CEO係最高軍階添

軍階越高,鑊氣越重(好似係)

呢單嘢搞到我喺地鐵大笑出嚟,真係尷尬。不過如果你係軍佬,你應該唔會想晉升,除非你好鍾意孭鑊啦。

發佈留言

發佈留言必須填寫的電子郵件地址不會公開。 必填欄位標示為 *

這個網站採用 Akismet 服務減少垃圾留言。進一步了解 Akismet 如何處理網站訪客的留言資料